Команданы дамыту: стратегиялық табысқа жету үшін лидерлер нені білуі керек
Команданы тиімді дамыту стратегиялық табысқа жету үшін қажет. Ұйымдар мүдделі тараптардың күрделі талаптары мен нарықтағы үздіксіз өзгерістерге тап болғанда, команданы дамыту ұйымның бірлігін, айқындығын және стратегиялық ықпалын күшейтетін тетікке айналады.
Мықты командалар дайын күйінде пайда болмайды — оларды құрады. Команданы дамытуға саналы түрде инвестиция салатын лидерлер тұрақты табысқа жағдай жасайды.
Әртүрлі салалардағы лидерлермен жұмысымыз әрекеттің саналы болуы маңызды екенін көрсетеді. Команданы дамытуға проактивті, қағидаларға негізделген көзқарас жоғары нәтижеге жеткізетін орнықтылық пен жауапкершілікті қалыптастырады. Төменде команданы дамытудың қырларын және қиын жағдайда да табысты жұмыс істейтін командаларды қалай басқаруға болатынын қарастырамыз.
Негізгі тұжырымдар:
- Команданы дамыту — адамдардың ортақ мақсаттарға бірге жетуіне мүмкіндік беретін саналы, үздіксіз жұмыс.
- Команданы тиімді дамыту сенімді, қарым-қатынасты және жауапкершілікті нығайтып, қақтығыстар мен күрделі жағдайларды еңсеруге көмектеседі.
- Команданың тұрақты дамуы айқындықты, үйренуді және ортақ жауапкершілікті күнделікті жұмысқа енгізетін лидердің жүйелі әрекеттеріне байланысты.
Команданы дамыту деген не?
Команданы дамыту — жағдай өзгерген сайын адамдар тобының бірлесіп тиімді жұмыс істеуіне мүмкіндік беретін саналы, үздіксіз еңбек. Ол командалардың мақсаттар бойынша бір бағыт ұстануына, жұмысты үйлестіруіне және тұрақты нәтижеге көмектесетін тәсілдермен уақыт өте үйренуіне бағытталады.
Қазіргі жағдайда команданы дамыту күрделіліктің артуын, шешім қабылдау циклдерінің жеделдеуін және күнделікті жұмыстағы ЖИ рөлінің өсуін ескеруі керек. Ақпарат жылдамырақ таралып, рөлдер өзгеріп жатқанда, командалар өзгермейтін құрылымдар мен қалыптасқан жұмыс тәсілдеріне ғана сүйене алмайды. Тиімді даму команданың жұмыс тәсілін бейімдеу, байыпты шешім қабылдау, нәтижеге назарын жоғалтпай жаңа құралдар мен талаптарды енгізу қабілетін күшейтеді.
Жүйелі даму командаларға мынадай мүмкіндік береді:
- Өзгерістерге қарамастан, бір бағытта әрекет ету.
- Ашық әрі құрметпен сөйлесу.
- Екіұшты жағдайларда сенімді әрекет ету.
- Нәтижеге жауапкершілік алып, бір-бірінің табысқа жетуіне көмектесу.
Команданы дамыту неліктен маңызды?
Команданы дамыту ұйымның ұзақ мерзім бойы нәтижелі жұмыс істеу қабілетіне тікелей әсер етеді. Командалар саналы түрде дамытылғанда, басымдықтар мен міндеттер айқынырақ болады. Адамдар өз жұмысының ортақ нәтижемен байланысын түсінеді; бұл тез өзгеретін ортада жиі туындайтын кедергілер мен жұмысты қайта жасау қажеттілігін азайтады.
Команданы дамыту ашық диалогқа да жағдай жасайды: алаңдаушылық, идеялар мен тәуекелдер нәтиже зардап шеккеннен кейін емес, ертерек анықталады. Уақыт өте бұл тәртіп сенімді нығайтып, қысым жағдайында бейімделуді жақсартады. Осындай жағдайлар жоғары нәтижелі командалар құрудың негізі.
Ең бастысы, команданы дамыту нәтижені жекелеген адамдардың жанкештілігіне немесе тұрақты жағдайға тәуелді етпейді. Басымдықтар өзгеріп, белгісіздік сақталған кезде де ол командаға бір бағыт ұстанып, байыпты шешім қабылдауға мүмкіндік береді.
Команданы тиімді дамытудың негізгі құрамдас бөліктері
Ортақ мән және мақсаттардың үйлесуі
Жұмысының мәні айқын емес команда табысқа жете алмайды. Командалар не істеу керегін ғана емес, оның неліктен маңызды екенін түсінгенде жоғары нәтиже көрсетеді. Жұмысты аса маңызды мақсатқа® (WIG®) негіздеу күш-қуат пен орындау қарқынын саналы бағыттауға мүмкіндік береді. WIG мақсаттарын команданы дамыту тәжірибесіне енгізу адамдарды ортақ нәтижеге біріктіріп, берілгендік пен ұжымдық жауапкершілікті күшейтеді. Команда мүшелеріне жеке де, ортақ та мәнді түсінуге көмектесетін тиімді лидерлер жеке тиімділік пен командалық жетістікті қамтамасыз ете отырып, ынтаны, жаңашылдықты және қызметкерлерді сақтап қалуды арттыра алады.
Командаларды ортақ бастамаларға біріктіріп, жоғары нәтижеге қалай жұмылдыруға болатынын тегін «Команда мақсаттарын нақтылау және орындаудың 4 қадамы» нұсқаулығынан біліңіз.
Ашық қарым-қатынас және кері байланыс
Тиімді командалар дер кезінде, шынайы әрі жүйелі сөйлеседі. Жиі және құрылымды қарым-қатынас команданы дамытудың маңызды құрамдас бөлігі — сенімді нығайтады. Лидерлер нәтижені талқылау, 1:1 кездесулері және ашық әңгімелер арқылы айқындықтың үлгісін көрсетуі керек. Ашықтыққа жағдай жасап, кері байланысты әдеппен беріп те, қабылдай да білу арқылы олар команданың барлық мүшесіне жағдайды бірдей түсінуге және бірге өсу мүмкіндігін бағалауға көмектеседі.
Лидерлерге тікелей бағынышты қызметкерлерімен саналы байланыс орнатып, оларды жұмысқа жұмылдыруға көмектесіңіз: тегін «Сенімді нығайтып, команданы шабыттандыратын 6 негізгі тіркес» нұсқаулығын жүктеңіз.
Жауапкершілік және нәтижеге иелік ету
Жауапкершілік — нәтижеге жеткізетін қозғаушы күш. Бірақ ең қуатты күш команданың бір-бірі алдындағы жауапкершілігі, яғни міндеттемені орындап, әріптестерін жерге қаратпауға деген ұмтылысы екенін аз лидер түсінеді.
Қағидаларға негізделген командалық даму нәтижеге иелік етуге ынталандырады. WIG мақсаттарына шоғырланған командалар озық көрсеткіштерді — ықпалы жоғары, нәтижені болжауға мүмкіндік беретін әрекеттерді — қадағалап, соларға сүйеніп жұмыс істейді. Олар есеп берудің тұрақты ырғағын сақтау үшін апта сайын орындау міндеттемелерін қабылдап, ілгерілеуді ынталандыратын нәтижелер тақтасында көрсетеді. Бұл құрылым команданы дамыту мен орындауды өлшенетін, қайталанатын тәжірибеге айналдырады. Лидерлердің жұмыста жауапкершілікті дамытуы және тәуекелдер мен сәтсіздіктерді өсу мүмкіндігі деп қарайтын орта құруы маңызды. Сонда команда кінә мен жағымсыз салдардан қорқудың орнына қолдауды сезініп, нәтижеге жауап бере алады.
Лидерлер өз бақылауындағы нәрселерге қалай жауапкершілік алып, командаларын соған шабыттандыра алатынын тегін «Тиімді лидерлер нәтижеге қалай жетеді: проактивтірек болудың 7 тәсілі» нұсқаулығынан біліңіз.
Сенім — нәтижелілікті арттыратын күш
Кәсіби ортада сенімнің сұранысы жоғары ресурс әрі бағалы валюта саналуы бекер емес. Сенім болмаса, командалар ақпаратты жасырып, күдікпен әрекет етеді; бұл өнімділікті төмендетеді, адамдарды бөледі, жаңашылдықты тежейді және жұмыстан алшақтауды күшейтеді. Сенім тапшылығы өсіп жатқанда, сенімі жоғары мәдениет құру бизнес үшін қажеттілік әрі нәтижелілікті арттыратын күшке айналады.
Сенім команданы жай өзара әрекеттесуден шынайы ынтымақтастыққа жетелейді. Ол адалдық, ниет және қабілет арқылы қалыптасады. Сенім қарым-қатынасты, жұмылуды және жаңашылдықты жақсартады — бұл команданы дамытуда саналы түрде қалыптастырылатын маңызды қасиеттер. Командасымен ықпалды қарым-қатынас орнатқысы келетін лидерлер тікелей бағыныштыларымен сөйлескенде сенімді нығайту жолдарын белсенді іздеуі керек: жанашырлық танытып, күтулерін анық жеткізіп, жауапкершіліктің үлгісін өздері көрсетуі қажет.
Лидерлер командаларын ортақ мақсатқа қалай шабыттандыра алатынын «Лидерлердің сенімді нығайтып, оны бұзбауының 6 тәсілі» нұсқаулығынан біліңіз.
Команданы дамытудың құрылымды жоспарын жасау қадамдары
Команданы дамытудың стратегиялық жоспары саналы құрылымы арқылы тұрақты, өлшенетін ілгерілеуді қамтамасыз етеді. Бұл — команданың әлеуетін тұрақты нәтижеге айналдыратын қайталанбалы жол картасы. Әр команда ерекше болғанымен, ықпалды даму жоспарының негізгі бөліктері өзгермейді: бағалау, үйлестіру, іске қосу және бейімдеу. Осы төрт негізгі кезеңді толығырақ қарастырайық.
1. Команданың қазіргі динамикасын бағалаңыз
Тиімді даму жағдайды түсінуден басталады. Алдымен лидер команданың қазіргі күйін: күшті жақтарын, байқалмайтын тұстарын, қуат деңгейін және тұлғааралық қатынастарын түсінуі керек. Диагностика белгілерді ғана емес, түпкі себептерді анықтап, өзекті әрі нысаналы даму тәсілін таңдауға көмектеседі.
Бағалау құралдары мен әдістеріне мыналар кіруі мүмкін:
- Пульс-сауалнамалар: команданың көңіл күйін, бір бағыт ұстануын және айқындығын қысқа, тұрақты бағалау.
- 360 градустық кері байланыс: адамдардың бір-бірінің көшбасшылығы мен ынтымақтастығын қалай қабылдайтынын жан-жақты көру.
- 1:1 әңгімелері: команда мәдениеті мен нәтижелілігіне әр адамның көзқарасын ашатын, сенімді нығайтатын талқылаулар.
- Команда тиімділігін диагностикалау: бір бағыт ұстануды, сенімді және орындауға дайындықты бағалайтын құрылымды құралдар.
Мұндағы мақсат — сынау емес. Мақсат — команданы дамытуды бастауға негіз болатын қазіргі жағдай туралы ортақ түсінік қалыптастыру.
2. Дамудың айқын, үйлескен мақсаттарын қойыңыз
Қазіргі күйін бағалаған соң команда алға жылжудың нақты бағытын белгілеуі керек. Айқындық команданы өзгертеді. Ортақ түсінік болмаса, күш-қуат шашырайды; ал ол бар кезде команда күшін мәнді, өлшенетін нәтижелерге бағыттайды. Команданың тиімді дамуы осы тұста жеделдей бастайды.
Тиімді мақсаттар команданың дамуына бағдар болып, мына талаптарға сай келуі керек:
- Нақты әрі аса маңызды болу: табыстың қандай болатынын анықтаңыз. Мысалы, «Бұл команда алдағы үш–алты айда қол жеткізуі тиіс ең маңызды бір нәтиже қандай?» деген мазмұнды сұрақ қойыңыз. Мұндай басымдық белгілеу артық нәрсені ысырып, назарды шоғырландырады.
- Озық көрсеткіштерді қамту: нәтижелерді, яғни кейінгі көрсеткіштерді қадағалаумен шектелмей, сол нәтижелерге жеткізетін әрекеттерді анықтаңыз. Мысалы, мақсат клиенттерді сақтап қалуды жақсарту болса, озық көрсеткіш клиентке алдын ала белсенді хабарласу жиілігіне қатысты болуы мүмкін. Нәтижені кейін бағалаудың орнына мұндай көрсеткіштер командаға жағдайды нақты уақытта көріп, қажетіне қарай әрекетін түзетуге және көбірек жеңіске жетуге мүмкіндік береді.
- Көрнекі нәтижелер тақтасын қарастыру: адамдар есеп жүргізгенде басқаша ойнайды. Сондықтан команда өзінің қай деңгейде тұрғанын анық көргенде ынтасын сақтайды. Қарапайым, көрнекі және тұрақты жаңартылатын ынталандырушы тақта даму барысын нақты көрсетеді.
- Есеп берудің тұрақты ырғағын қалыптастыру: ілгерілеу мен алдағы әрекеттерді талқылайтын апта сайынғы есеп беру кездесулері мақсатқа жеткізетін мінез-құлық міндеттемелерін нығайтады.
Іс жүзіндегі мысал:
Нарыққа шығуға дайындалып жатқан өнім командасы WIG мақсатын анықтайды: «X өнімін Q4 соңына дейін сәтті шығару және іске қосылғаннан кейін күрделі ақауларға жол бермеу». Оны қолдайтын озық көрсеткіштерге әзірлеу, маркетинг және қолдау жұмыстарын үйлестіру үшін екі апта сайын функцияаралық кездесулер өткізу, сондай-ақ әр мүмкіндіктің тәуекелдерін әзірлеу спринттерінен екі апта бұрын бағалау кіреді. Апталық нәтижелер тақтасы осы әрекеттердің орындалуын көрсетеді, ал 1:1 кездесулері мәселелерді анықтап, бағытты дер кезінде түзетуге көмектеседі.
Даму мақсаттарын сыналған жүйелерге негіздеу арқылы лидерлер команданың дамуын бір бағытқа үйлестіріп қана қоймай, оны іс жүзінде орындалатын және өлшенетін өзгерістерге жеткізетін етеді.
3. Командаға бейімделген оқу және даму бастамаларын іске қосыңыз
Мақсаттар қойылған соң, ойдағы болашақты саналы тәжірибе арқылы іске асыру керек. Команданы тиімді дамыту ресми оқуды да, күнделікті тәжірибені де қамтиды.
Іске асыру тәсілдеріне мыналар кіруі мүмкін:
- Дағдыларды дамыту практикумдары: кері байланысты қабылдау, эмоциялық интеллект, икемді орындау немесе шешім қабылдау сияқты маңызды командалық қабілеттерге арналған бетпе-бет не цифрлық сабақтар. FranklinCovey вебинарларын тікелей эфирде және жазбада қараңыз.
- Тәжірибе арқылы оқу: симуляциялар, көшпелі кездесулер немесе бөлімдер арасындағы бірлескен міндеттер ұғымдарды өзгермелі, шынайы жағдайларда қолдануға мүмкіндік береді.
- Әріптестік коучинг және кері байланыс топтары: команда мүшелерін жұптастырып, бір-біріне сындарлы кері байланыс беруге және даму мақсаттарына жетуде қолдау көрсетуге ынталандырыңыз. Бұл жауапкершілік пен өзіндік талдауды күшейтеді.
Мақсат — өсуді команданың ырғағына енгізу — оны бөлек бастама емес, күнделікті жұмыс тәсілінің бір бөлігі ету.
4. Қадағалаңыз, өлшеңіз және бейімдеңіз
Кез келген стратегиялық үдеріс сияқты, команданы дамыту да тұрақты бағалауды талап етеді. Лидерлер ненің жұмыс істейтінін, нені түзету керегін түсіну үшін нақты нәтижелерді де, мінез-құлық өзгерістерін де қадағалауы қажет.
Негізгі көрсеткіштерге мыналар кіруі мүмкін:
- Жұмылу көрсеткіштері: команданың көңіл күйі жақсарып келе ме? Адамдар белсендірек үлес қосып жүр ме?
- Орындау көрсеткіштері: озық көрсеткіштерге қол жеткізіліп жатыр ма? Команда тақтасындағы нәтижелер дұрыс бағытта өзгеріп жатыр ма?
- Сенім мен қарым-қатынас сапасы: кері байланыс әңгімелері жиілеп келе ме? Қиын талқылаулар нәтижелірек бола бастады ма?
- Қызметкерлерді сақтап қалу және дамыту: команда мүшелері ұйымнан кетпей, өсіп, нәтиже көрсетіп жүр ме?
Тұрақты командалық кездесулер мұндай талдауға құрылым береді. Бұл — жетістіктерді атап өтіп, бағыттан ауытқыған күш-жігерді түзетіп, міндеттемені жаңартатын уақыт. Команда өзгерген сайын даму жоспары да өзгеруі керек. Мықты командалар алдағы жолын қайта бағалап, нақтылау арқылы икемділігін сақтайды.
Команданы дамытудағы лидердің рөлі
Көшбасшылық — адамдарға олардың құндылығы мен әлеуетін өздері де көре алатындай анық жеткізу.
Әр жоғары нәтижелі команданың негізінде саналы әрекет ететін лидер тұрады. Лидерлер міндеттерді басқарудан адамдардың мүмкіндіктерін кеңейтуге көшкенде, команданы дамыту табысқа жеткізіп, оны тұрақты етеді. Мықты лидерлер көргісі келетін мінез-құлықтың үлгісін көрсетіп, әрекетке бағытталған құрылымдар қалыптастырады. Төменде ұйымдағы команданың дамуына назар аударудың бес үздік тәсілі берілген.
Лидердің ойлау жүйесін дамытыңыз
Команданы дамыту лидердің өз рөлін қалай түсінетінінен басталады. «Мен нәтижеге жауаптымын» деген ұстанымнан «Мен нәтижеге жеткізетін адамдарға жауаптымын» дегенге көшу команда мәдениетіне, нәтижелілігіне және өсуіне көзқарасты өзгертеді. Бұл ойлау жүйесі адамның әлеуетіне инвестиция салып, күшті жақтарын танып, команда мүшелері өркендейтін орта құру арқылы ұзақ мерзімге қарауға үйретеді. Өз мүддеңізден жоғары тұрып көш бастауды қалай бастауға болатынын біліңіз.
1:1 кездесулерін тұрақты өткізіңіз
Саналы 1:1 кездесулері — команданы тиімді дамытудың іргетасы. Мұндай құрылымды талқылаулар сенімді нығайтады, кедергілерді анықтайды және жеке мақсаттарды командалық мақсаттармен үйлестіреді. Олар жай жұмыс есебі емес: коучингке, сенімді күшейтуге, жетістіктерді атап өтуге және қарым-қатынасты тереңдетуге мүмкіндік. Лидерлер 1:1 кездесулерін жеңіске жету үшін пайдаланғанда, жағдайды ескере отырып кері байланыс беріп, қолдауды әр адамның даму қажеттілігіне бейімдей алады.
Команда мүшелерімен тиімдірек кездесулер өткізіңіз: тегін «Тікелей бағыныштылармен 1:1 кездесулерін жақсартатын 100+ сұрақ» нұсқаулығын жүктеңіз.
Команданың нәтижеге жетуіне жағдай жасаңыз
Біздің зерттеулеріміз қызметкерлердің тек 15%-ы ұйымының ең маңызды мақсаттарын білетінін көрсетеді. Лидерлер команданың табысқа жетуіне жағдай жасауда шешуші рөл атқарады: рөлдерді нақтылайды, күтулерді анық белгілейді және жауапкершілік жүйелерінің болуын қамтамасыз етеді.
Жеңіске жетуге болатын ойын құрып, командаларды басты бастамалар төңірегіне қалай біріктіруге болатынын «Стратегиялық мақсаттарыңызды орындап, серпінді нәтижелерге жетіңіз» нұсқаулығынан біліңіз.
Сенімі жоғары кері байланыс мәдениетін құрыңыз
Сенімі жоғары командалар кері байланысты жиі әрі сындарлы береді және қабылдайды. Лидерлер кері байланысты екіжақты тәжірибе ретінде қалыптастырып, өздері үлгі көрсетуі керек. Тұрақты кері байланыс әңгімелері үйрену мен өсуді ынталандырады. Бұл қызметкерлерге өздерінің еленетінін, тыңдалатынын және қолдау табатынын сездіріп, даму қарқынын арттырады.
Тегін «Өркендейтін жұмыс мәдениетінің 4 тірегі» нұсқаулығын жүктеп, бүгінгі ең табысты ұйымдар нәтижелілікті қалай арттыратынын біліңіз: олар икемділікті, сенімді және жауапкершілікті дамытады.
Команданы өзгерістер мен күрт бетбұрыстардан алып өтіңіз
Өмірде де, бизнесте де өзгермейтін жалғыз нәрсе — өзгеріс. Өтпелі кезеңдер мен белгісіздік кезінде команданы дамыту одан да маңызды. Команда жаңа басшылыққа, сыртқы факторлардан туындаған стратегия өзгерісіне немесе жаңа қажеттіліктерге сай рөлдердің ауысуына тап болсын, өзгерістер кезіндегі көшбасшылық бағыт та, түсінік те береді. Өзгерістің «неліктен» қажет екенін түсіндіріп, оны «қалай» жүзеге асыруды анықтауға команданы қатыстыру арқылы лидерлер орнықтылық пен ортақ жауапкершілікті нығайтады.
Тегін «Өзгеріс энергиясы» нұсқаулығын жүктеп, құбылмалы жағдайда ұжымдық әрекетке жетелейтін лидердің бес мінез-құлық үлгісі туралы біліңіз.
Команданы дамытуда жиі кездесетін қиындықтарды еңсеру
Команданы дамыту жолында ең берілген лидерлердің өзі кедергілерге тап болады. Бұл қиындықтар сәтсіздіктің белгісі емес, айқынырақ, сеніммен және саналы түрде басшылық етуге мүмкіндік. Біздің сыналған жүйелеріміз кең таралған кедергілерді шешуге және оларды тереңірек өсу мен бірлікке серпін беретін күшке айналдыруға көмектесетін практикалық шешімдер ұсынады.
Мақсаттардың үйлеспеуі
Команда мүшелерінде ортақ мақсат болмаса немесе олар өз жұмысының ауқымды міндеттерге қосатын үлесін түсінбесе, түсінбеушілік пен көңіл қалу пайда болады. Мұндай үйлеспеушілік күш-қуатты сарқып, жақсы ниеттің нәтижесіз қалуына әкеледі. WIG мақсаттары, нәтижелер тақтасы және тұрақты талқылаулар — команданы дамытуда назарды сақтаудың сыналған тетіктері. Стратегиялық бағытқа көмектесетін әрекеттерді атап өтіп, ауытқуларды түзету арқылы тиімді лидерлер үйлеспеушіліктің алдын алып, команда мүшелері арасында синергияны күшейте алады.
Командаларыңыз қажетті әрекеттерге жұмылған ба? Назарды шоғырландырып, ең үлкен ықпал ететін әрекеттерді «80/20 әрекет талдағышы» құралы арқылы анықтаңыз.
Жұмысқа жұмылмаған қызметкерлер
Жұмыстан алшақтау әрдайым айқын көріне бермейді. Қызметкерлердің жұмысқа жұмылмауы байқалмай қалуы мүмкін: қатысу азаяды, үлес қосуға батылы жетпейді, ынта бәсеңдейді. Назардан тыс қалса, ол команданың көңіл күйіне, өнімділігіне және адамдарды сақтап қалуға зиян келтіреді. Құрылымды, мәнді 1:1 кездесулері оң көзқарас пен ілгерілеуді қолдап, команданың дамуын және қайта жұмылуын жандандырады. Бұл әңгімелер тек нәтиже туралы емес, адамдардың өздері туралы да. Адам өзін байқағанын және түсінгенін сезсе, жұмысқа қайта қосылады. Мұндай тәсіл жай талапқа бағынуды емес, эмоциялық берілгендікті қалыптастырады.
«Қызметкерлерді жұмылдыру өнері» нұсқаулығын жүктеп, жұмысқа жұмылмаудың жасырын себептері мен шығындарын және байланысты қалай қалпына келтіруге болатынын біліңіз.
Өзгерістерге қарсылық
Өзгерістен шаршау — шынайы құбылыс, ал келіспеушіліктің астарында жиі қорқыныш жатады. Команда мүшелері белгісіздіктен қорыққандықтан, шешім қабылдаудан шет қалғанын сезгендіктен немесе басшылыққа сенімін жоғалтқандықтан өзгеріске қарсы болуы мүмкін. Оған дұрыс жауап берілмесе, қарсылық команданың дамуын тоқтатады. Қолайсыз сезімдерді мойындап, ашық жауап беретін лидерлер эмоциялық бейімделуді жеделдетеді. Өзгерістің болжамды заңдылығын түсіну және команданы одан алып өте білу табысты даму үшін аса маңызды.
Лидерлеріңіз өзгерістерді тиімді түсіндіріп, команданың қолдауына ие бола ала ма? Тегін «Өзгерістерді қалай жеткізу керек» құралын жүктеңіз, ол команданы күрт бетбұрыстардан алып өтуге көмектеседі.
Қарым-қатынастағы үзілістер
Қарым-қатынастың дұрыс нормалары болмаса, жоғары нәтижелі команданың өзі сүрінуі мүмкін. Жетпеген кері байланыс, түсініксіз күтулер немесе шешілмеген қақтығыстар сенімді әлсіретіп, ілгерілеуді баяулатады. Қарым-қатынас іркілсе, команданың даму қарқыны да төмендейді. Мұндай қиындықтардың түбінде жиі қорқыныш жатады: дұрыс түсінілмеу, өзгені ренжіту немесе әлсіз көріну қорқынышы. Бұған қарсы тұру үшін лидерлер ашық диалогтың үлгісін көрсетіп, оны жүйелі тәжірибеге айналдыруы керек. Уақыт өте ашық қарым-қатынас команда нормасына айналады. Айқындық пен сенім артқан сайын ынтымақтастық тереңдейді, ал адамдар қақтығысты сеніммен және өзара құрметпен шешуді үйреніп, команданың дамуын жеделдетеді.
Лидерлер қиын жағдайларда қалай тиімді әрекет етіп, жоғары нәтижелі командалар құра алатынын «Қиын әңгімелер: шиеленісті сенімді шешудің 4 стратегиясы» нұсқаулығынан біліңіз.
Команданың дамуына ықпал ететін лидерлерді дамыту
Лидерлер команданы дамытуды істер тізіміндегі белгі емес, стратегиялық қажеттілік деп қарағанда, өзгеріс пен алға жылжуға дайын, мүмкіндігі кең топтар құрады. Айқындыққа, сенімге, кері байланысқа және орындауға негізделген саналы күнделікті тәжірибе команданың жұмыс істеуі мен нәтижеге жетуін өзгертеді.
FranklinCovey көмегімен ұйымыңызда бірлігі мықты, жоғары нәтижелі командаларды іске жұмылдырыңыз. Адамдар өз еркімен соңынан еретін лидерлерді дамытып, командаларыңыздың толық әлеуетін ашқанда, ұйымыңыз әр деңгейде көбірек ықпал ете алады.
